Margir hafa eflaust velt fyrir sér hvort Vladímír Pútín, Rússlandsforseti, sé lögmætt skotmark í ljósi innrásar Rússa í Úkraínu. Spurningin hljómar kannski undarlega í eyrum annarra en sérfræðingar segja að það sé ekki brot á alþjóðalögum ef einstök ríki reyna að ráða þjóðhöfðingja annars ríkis af dögum ef ríkin eiga í stríði.

TV2 skýrir frá þessu. Hefur miðillinn eftir Kenneth Øhlenschlæger Buhl, hjá danska varnarmálaskólanum, að ef viðkomandi sé þjóðhöfðingi og samtímis yfirmaður hersins, bæði formlega og í raun, þá sé viðkomandi löglegt skotmark þegar stríð geisar.

Astrid Kjeldgaard-Pedersen, prófessor við Kaupmannahafnarháskóla, tók undir þetta og sagði að þegar stríð geisi sé gerður greinarmunur á óbreyttum borgurum og þeim sem berjast. Hermenn taki þátt í bardögum og það megi drepa þá og Pútín sé æðsti yfirmaður rússneska hersins og falli því undir það að vera þátttakandi í bardögum.