Ekki er útilokað að skápaköngulær (Steatoda grossa) nemi land hér á landi. Nýlega fannst ein slík á lager vefverslunar einnar í Reykjavík. Köngulær þessarar tegundar líta í fljótu bragði út eins og ekkjuköngulær. Eru svartar og með gljáandi útblásinn afturbol og fótaburðurinn er sá sami. Hún getur bitið ef fiktað er í henni en kýs þó frekar að leggja á flótta ef hún er áreitt og er alls ekki árásargjörn.

Þetta segir í umfjöllun Erling Ólafssonar, náttúrufræðings, á Facebooksíðunni Heimur smádýranna. Hann segir lítið því til fyrirstöðu að þessi tegund nemi land hér á landi í framtíðinni. Tegundin finnst um allan heim og í Evrópu allt norður að okkar breiddargráðum.

En til að hún nemi hér land þarf hún að berast hingað í einhverjum mæli segir Erling í færslunni. Hann segir að bit hennar séu merkjanleg og eituráhrifa gæti en þau líði fljótt hjá. Annars sé skápaköngulóin hættulaus.