Heimir Guðjónsson þjálfari Vals var gestur í sjónvarpsþættinum 433.is á Hringbraut í gær þar sem hann gerði upp síðasta tímabil á Hlíðarenda og horfði til þess næsta.

„Þetta er margþætt, við misstum dampinn. Menn misstu sjálfstraust og við reyndum að finna lausnir á þessu en það gekk ekki, það verður að viðurkennast. Í framhaldi af því höfum við farið í rannsóknarvinnu og leitað leiða til þess að ef þetta kemur fyrir aftur þá verðum við með betri lausnir. Það er langtíma verkefni, það er langt í mótið og við höfum tíma til að vinna í þessum hlutum. Þetta gerist 2019 og gerist 2021 hjá Val, við viljum ólmir koma í veg fyrir að þetta gerist einu sinni enn,” segir Heimir um hvað fór klikkaði hjá Val á síðustu leiktíð.

„Við hefðum mátt spila betur. Að búa til velgengni er eitt en að viðhalda henni er allt annað, þú getur ekki alltaf spilað brasilískan bílastæðabolta ef þú ætlar að viðhalda árangri. Það er ekki alltaf skemmtilegasti fótboltinn sem vinnur flestu titlana. Fótboltinn var ekki góður á köflum, það vantaði betri boltalausa hreyfingu í sókninni og meiri græðgi. Þetta var alveg sami fótbolti og 2020 þar sem við skoruðum 50 mörk í 18 leikjum, við verðum að finna lausn á þessu,” segir Heimir.

„Valur vill keppa um þessa titla er í boði, við höfum verið að breyta liðinu og reyna að styrkja okkur. Við ætlum að halda áfram í því. Við þurfum að reyna að virkja menn betur ef það er mótlæti, að menn stígi upp og taki að sér hlutverk leiðtoga. Við erum að reyna að nota ýmis brögð til að koma okkur aftur þangað sem við viljum vera“

Klaufaleg endalok í máli Hannesar

Hannes Þór Halldórsson og Valur sömdu um starfslok að loknu tímabili. Vakti það athygli að Heimir vildi losa sig við einn besta markvörð í sögu Ísland. „Ég er þeirrar skoðunar að svona mál eru leyst innanbúðar, þau eru ekki leyst í fjölmiðlum. Ég tók ákvörðun að á þessum tímapunkti þyrfti að breyta hópnum og þetta var niðurstaðan. Ég hef ekki lagt það í vana minn að þegar ég læt leikmenn fara að tjá mig í fjölmiðlum. Ég hef látið leikmenn fara, leikmenn hafa farið frá mér og það hefur fullt af leikmönnum sem hafa ekki viljað koma til mín. Alltaf þegar eru gerðar breytingar þá er eitthvað sem býr að baki, þetta mál var leyst innan félagsins,” sagði Heimir.

Þegar málið var leyst greindi Valur frá því á samfélagsmiðlum að Hannes hefði verið rekinn, það var rangt.

„Mér fannst þetta klaufalegt, menn læra af þessu og halda áfram. Þetta er búið.“