Fjórir fangar í fangelsinu í Washington County í Arkansasríki Bandaríkjanna hafa stefnt lækni fangelsisins, fangelsisstjóranum og fangelsinu sjálfu vegna lyfja sem þeim var gefið eftir að þeir greindust með Covid-19 innan veggja fangelsisins.

New York Times greindi frá þessu fyrr í morgun og segir jafnframt að mönnunum hafi verið gefið ormalyfið Ivermectin, þvert á ráðleggingar heilbrigðisyfirvalda í landi um að Ivermectin geri nákvæmlega ekkert fyrir Covid sjúklinga.

Í stefnu mannanna fjögurra, Dayman Blackburn, Julio Gonzales, Jeremiah Little og Edrick Floreal-Wooten, segir að eftir jákvæða greiningu hafi fangarnir fjórir verið færðir í einangrun innan fangelsisins og gefið lyfjakokteil tvisvar á dag. Þeim var tjáð af fangelsislækninum Robert Karas að um væri að ræða vítamín, stera og sýklalyf.

Raunveruleikinn var hins vegar sá, sem fyrr sagði, að læknirinn var að lauma í þá Ivermectin.

Ýmsar ævintýralegar samsæriskenningar hafa gengið um virkni lyfsins gegn Covid-19 þrátt fyrir ítrekaðar tilraunir heilbrigðisstofnana og yfirvalda um heim allan til þess að kveða þær niður. Þessar kenningar hafa meðal annars gert vart við sig hér á landi, en DV greindi frá því fyrir skömmu að Margrét Friðriksdóttir hefði greinst með Covid og væri byrjuð að taka Ivermectin við veirusýkingunni. Gaf hún dætrum sínum jafnframt lyfið þegar þær greindist með Covid og viðurkenndi hún að hún hafi aðstoðað fleira fólk við að komast í lyfið með „óhefðbundnum“ leiðum.

Læknirinn Robert Karas stendur í sömu trú og Margrét og tók sjálfur Ivermectin þegar hann greindist jákvæður fyrir Covid í ágúst á síðasta ári. Þá hefur hann jafnframt stært sig af því á samfelagsmiðlum að nota ormalyfið óspart á sjúklinga sína sem greinast með Covid-19.