Meðan veturkonungur úti blæs er ekkert betra en að njóta þess að borða nýbakað brauð í huggulegheitum með fjölskyldunni. Hér erum með við komin með uppskrift af þessu fína hollustubrauði úr smiðju Berglindar Hreiðar matar- og ævintýrabloggara með meiru hjá Gotterí og gersemar. Það tekur örskamma stund að baka þetta brauð sem er mikill kostur.

„Þetta brauð er gott með öllu mögulegu. Á heimilinu er brauðið ýmist borðað með smjöri og osti eða kotasælu og papriku/gúrku eftir því hvað hver vildi,“ segir Berglind.

Speltbrauð

300 ml mjólk

4 msk. sítrónusafi

370 g spelthveiti

90 g haframjöl (gróft)

2 tsk. matarsódi

1 ½ tsk. salt

150 g blönduð fræ

1. Hitið ofninn 200°C
2. Blandið sítrónusafa saman við mjólkina og leyfið að standa í um 5 mínútur.
3. Blandið öllum þurrefnunum saman í hrærivélarskálina og notið krókinn.
4. Hellið mjólkurblöndunni saman við og blandið vel og því næst fræjunum.
5. Spreyið brauðform með PAM og hellið deiginu í formið, stráið fræjum yfir áður en bakað.
6. Bakið í um 25 mínútur eða þar til kantarnir verða aðeins gylltir.

Síðan er bara að njóta og velja álegg eftir smekk hvers og eins og ekkert er betra en ylvolgt brauð beint úr ofninum með smjöri sem bráðnar ofan á.