Guðmundur Ingi Þóroddsson, formaður Afstöðu, skorar á dómsmálaráðherra að veita föngum jólabónus til að þeir hafi efni á að gefa börnum sínum jólagjöf. Þetta kemur fram í nýjum pistli Guðmundar á vef Afstöðu.
„Öllum er ljóst að fangar eru afgangsstærð í íslensku samfélagi en sama skapi bitnar sú staðreynd harkalega á saklausum börnum þeirra sem afplána dóma sína,“ segir hann.
Guðmundur bendir á að fangar fá greidda dagpeninga og fæðisfé sem nýtast á til að kaupa mat og aðrar nauðsynjar. Þessi upphæð hafi haldist óbreytt í fimmtán ár og nemur 3.100 krónum á viku. Á þessum fimmtán árum hafi verðlag hins vegar hækkað gríðarlega á þessum tíma.
„Nú er svo komið að fangar hafa hreinlega ekki efni á fæði, brýnustu hreinlætisvörum og hvað þá öðru smáræði sem þarf að kaupa, eins og jólagjafir handa börnum sí nú um. Öllum hækkunum hefur verið komið fyrir á herðum fanga og var byrðin þar næg fyrir. Fangar fá ekki desemberuppbót og langflestir þeirra sem afplána á Litla-Hrauni eru atvinnulausir og fá þar af leiðandi enga auka þóknun umfram dagpeninga og fæðisfé. Atvinnuleysið er ekki þeim að kenna. Það er enga vinnu að hafa. Þessir menn geta ekki glatt börn sín með smáræði um jólin,“ segir Guðmundur og telur það forgangsverkefni nýs dómsmálaráðherra að láta fanga fá jólabónus.
