Íslenska karlalandsliðið vantar aðstoðarþjálfara til að styðja við Arnar Þór Viðarsson, landsliðsþjálfara. KSÍ nýtti sér á dögunum uppsagnarákvæði í samningi Eiðs Smára Guðjohnsen sem gegndi stöðunni.

Arnar Þór hefur sagst vilja Íslending til að gegna stöðunni. Erfitt er að sjá sem stendur hver það ætti að vera.

Málið var til umræðu í þættinum Íþróttavikan með Benna Bó á Hringbraut í gær. Þar stýrir Benedikt Bóas Hinriksson þættinum og er með Hörð Snævar Jónsson sem sérfræðing. Í hverri viku kemur svo gestur í settið. Í þetta sinn var það Hjörvar Hafliðason.

,,Það myndi fara ákaflega illa í félögin ef KSÍ myndi taka starfandi þjálfara af liði. Ég sé ekkert að því að starfandi þjálfari sé þjálfari inni í KSÍ. Ég sé ekkert að því að starfandi markmannsþjálfari vinni með sambandinu,“ sagði Hjörvar.

Hann hélt áfram: ,,Landsliðsþjálfarastarf er hlutastarf, sérstaklega aðstoðarþjálfari.“

Hjörvar vill sjá KSÍ taka upp tólið og heyra í Heimi Hallgrímssyni með það í huga að fá hann til að þjálfa íslenska landsliðið ásamt Arnari. Heimir var þjálfari þegar Ísland fór á EM 2016 og HM 2018.

,,Ég hef lesið greinar eftir Hörð þar sem hann hefur talað um að við ættum að reyna að fá Heimi Hallgrímsson aftur og að þessi tveir menn (Arnar Þór og Heimir) stjórni. Mér finnst það ágætis hugmynd en ég veit reyndar ekkert hvort að Heimir hafi einhvern áhuga á því. Það má allavega hringja í hann.“

,,Mér finnst svolítið einkennilegt að vera að einskorða þetta við Ísland svona fljótt,“ sagði Hörður Snævar að lokum.

Þáttinn í heild má sjá hér fyrir neðan.