Miklar vangaveltur hafa verið um mögulegt ástarsamband leikkonunnar Angelinu Jolie og tónlistarmannsins The Weeknd.

The Weeknd heitir réttu nafni Abel Makkonen Tesfaye.

Síðan í sumar hefur sést til stjarnanna saman þrisvar en hvorugt þeirra hefur tjáð sig opinberlega um málið. Og ætla greinilega ekki að gera það á næstunni ef marka má hvernig Angelina vék sér undan spurningu um The Weeknd í nýlegu viðtali.

Angelina Jolie leikur í nýju Marvel myndinni The Eternals sem kemur út þann 5. nóvember næstkomandi. Hún er því á fullu að kynna myndina ásamt meðleikurum sínum. Hún og Salma Hayek voru í viðtali hjá E! News á mánudaginn þegar þáttastjórnandinn spurði hvort að börnin hennar væru meira spennt fyrir því að hún væri í myndinni eða vináttu hennar og The Weeknd.

Angelina Jolie á sex börn með fyrrverandi eiginmanni sínum og leikaranum Brad Pitt.

Atvikið var frekar vandræðalegt en Angelina er fagmaður fram í fingurgóma og kom sér auðveldlega undan spurningunni og sagði:

„Þau eru mjög spennt fyrir myndinni, ef það er það sem þú ert að spyrja að.“ Og deildi síðan augnaráði með Salmu Hayek.

Aðdáendur virðast því þurfa að bíða aðeins lengur eftir því að stjörnurnar tjái sig um hvort annað. Við bíðum þolinmóð.