Tveimur leikjum var að ljúka í næstsíðustu umferð Pepsi Max-deildar karla. ÍA sigraði Fylki örugglega og Keflavík hafði betur gegn Leikni.

ÍA tók á móti Fylki í sannkölluðum botnslag. Þórður Gunnar Hafþórsson leikmaður Fylkis fékk rautt spjald strax á 12. mínútu og ÍA fékk vítaspyrnu í kjölfarið. Steinar Þorsteinsson tók spyrnuna og skoraði örugglega úr henni kom kom ÍA yfir. Það reyndist Fylkismönnum erfitt að vera einum færri þegar leið á leikinn og gengu leikmenn ÍA á lagið. Hákon Ingi Jónsson tvöfaldaði forystuna á 50. mínútu, Jón Gísli Eyland Gíslason skoraði þriðja markið á 77. mínútu og Ingi Þór Sigurðsson og Eyþór Aron Wöhler gulltrygðu svo sigur heimamanna undir lok leiks með fjórða og fimmta markinu.

Þetta þýðir að ÍA er komið með 18 stig og fer upp í 10. sæti og úr fallsæti en HK sem er nú í 11. sæti á þó leik til góða. Fylkir er í botnsæti deildarinnar með 16 stig.

ÍA 5– 0 Fylkir
1-0 Steinar Þorsteinsson (´13)
2-0 Hákon Ingi Jónsson (´50)
3-0 Jón Gísli Eyland Gíslason (´77)
4-0 Ingi Þór Sigurðsson (´82)
5-0 Eyþór Aron Wöhler (´91)
Þórður Gunnar Hafþórsson, rautt spjald (´12)

Joey Gibbs kom Keflavík yfir á 23. mínútu leiksins með frábæru marki beint úr aukaspyrnu. Það reyndist vera eina mark leiksins.
Keflavík er í 9. sæti með 21 stig og Leiknir í 8. sæti með 22 stig.

Leiknir R 0 – 1 Keflavík
0-1 Joey Gibbs (´23)