Michael Mcfeat, breskur starfsmaður í gullnámu í Kirgistan, hefur verið handtekinn fyrir að kalla hátíðarmat þar í landi „hestatyppi.“ Mcfeat á yfir höfði sér kæru vegna málsins og verði hann fundinn sekur gæti hann eytt næstu þremur til fimm árum í fangelsi.

Frá þessu er greinir Guardian en þar segir að Mcfeat hafi birt færslu á Facebook-síðu sinni þar sem hann kallaði hátíðarmat samstarfsfélaga sinna frá Kirgistan, „hestatyppi.“

Mcfeat starfar hjá fyrirtækinu Centerra Gold og samkvæmt yfirvöldum í Kirgistan er hann nú í gæsluvarðhaldi vegna málsins.

Mcfeat birti mynd á Facebook þar sem hann greindi frá því að samstarfsfélagar hans frá Kirgistan ætluðu að borða „chuchuk,“ sérstaka pylsu gerða úr hrossakjöti, um hátíðirnar og sagði hann þá vera að fara að borða „hestatyppi.“ „Chuchuk“ þykir mikið lostæti í Kirgistan og urðu samstarfsmenn Mcfeat æfir vegna ummæla hans.

Ummæli Mcfeat urðu meðal annars til þess að starfsmenn námunnar fóru í tímabundið verkfall.

Samkvæmt talsmanni innanríkisráðuneytis Kirgistans er Mcfeat í haldi fyrir að hafa ollið verkfallinu en tekjur frá námunni nema um 10 prósentum af verðmæti þjóðarframleiðslu landsins.

Mcfeat eyddi færslunni og baðst afsökunar áður en hann var handtekinn. Hann sagðist ekki hafa ætlað að móðga neinn.

Talsmenn breska utanríkisráðuneytisins segjast ætla að hjálpa Mcfeat en hafa þó ekki tekist að fá hann lausan úr haldi.

„Við erum í sambandi við yfirvöld á staðnum og erum reiðubúin að veita honum ráðgjöf vegna málsins.“