Ákæra hefur verið gefin út á fjórar manneskjur vegna morðsins á Albananum Armando Bequiri, sem skotinn var til bana fyrir utan heimili sitt laugardagskvöldið 13. febrúar. Meðal sakborninganna fjögurra er Claudia Sofia Soelho Carvalho, kona fædd árið 1990, en hún njósnaði um Armando í aðdraganda morðsins og gaf upplýsingar um ferðir hans.
Ljóst er af ákærunni að morðið var þaulskipulagt. Einn hinna ákærðu er Murat Selivrada, maður sem býr á Seltjarnarnesi og er fæddur árið 1989. Murat er sagður hafa sýnt Claudiu tvo bíla í eigu Armando sem lagt var við Rauðarárstíg. Claudia fékk þau fyrirmæli að fylgjast með bílunum og senda skilaboð þegar annar þeirra legði af stað frá Rauðarárstíg áleiðis í Rauðagerði. Þetta gerði Claudia.
Þriðji ákærði maðurinn er Shpetim Querimi, fertugur maður sem býr í Hafnarfirði. Hann ók ásamt Angjelin að Rauðagerði rétt fyrir miðnætti laugardagskvöldið 13. febrúar og stöðvuðu þeir bílinn nálægt horni Rauðagerðis og Borgargerðis. Síðan segir orðrétt í ákæru héraðssaksóknara:
„Þegar bifreið Armando var ekið að heimili hans að Rauðagerði 28 ók ákærði Shpetim í humátt á eftir honum, hleypti meðákærða Angjelin úr bifreiðinni við hús nr. 28 og ók svo áfram nokkrar húsalengdir þar sem hann snéri bifreiðinni við og beið þar til meðákærði Angjelin gaf honum merki um að sækja sig. Þá ók ákærði Shpetim austur Rauðagerði og tók meðákærða Angjelin upp í bifreiðina í Borgargerði. Þeir óku svo út úr bænum og í Varmahlíð í Skagafirði, með viðkomu í Kollafirði þar sem meðákærði Angjelin losaði sig við skammbyssu með því að henda henni í sjóinn.“
Angjelin Sterkaj er sakaður um að hafa skotið Armando til bana. Hann faldi sig við hús Armandos í Rauðagerði, við bílskúrinn, og þegar Armando kom út úr bílskúnum skaut Angjelin hann níu sinnum í líkama og höfuð með 22 kalibera Sig Sauer skammbyssu. Armando lést af skotáverkum sem hann hlaut á heila og brjóst.
Angjelin og Shpetim forðuðu sér síðan úr hverfinu og óku út úr bænum til Varmahlíðar í Skagafirði. Á leiðinni stöðvuðu þeir í Kollafirði þar sem Angjelin losaði sig við byssuna í sjóinn.
Þórunn Helga Gunnarsdóttir, ekkja Armandos, gerir miskabótakröfur fyrir hönd sín, fyrir hönd barns þeirra hjóna og fyrir hönd ófædds barns þeirra. Einnig gera albanskir ættingjar Armandos miskabótakröfur og nema þessar bótakröfur samtals um 70 milljónum króna.
Málið verður þingfest á morgun fyrir Héraðsdómi Reykjavíkur. Þinghlé verður í héraðsdómi í lok júní og því er ólíklegt að málinu ljúki fyrr en með haustinu í fyrsta lagi.
