Óhætt er að segja að samfélagsmiðlar logi enn af umræðum um hugsanlega kókaínneyslu Damiano David, söngvara bandsins Maneskin sem sigraði Eurovision í gærkvöldi. Sögurnar fóru á flug þegar myndavélar náðu skoti af David í beinni útsendingu beygja sig niður að borðinu og hnykkja höfði sínu til hliðar líkt og hann væri að „fá sér línu“ af borði þeirra í græna herberginu svokallaða, baksviðs í höllinni þar sem keppnin fór fram.

Þegar liðsfélagi David sá að bandið væri komið í beina útsendingu virðist hann hnippa í félaga sinn og glotta. Myndbandið af athæfinu má sjá hér að neðan.

Myndbandið fór sem eldur um sinu á samfélagsmiðlum og var raunar komið í fulla dreifingu áður en bandið steig á svið til þess að slíta keppninni með sigurlagi sínu. Á blaðamannafundi sem fram fór eftir keppnina var hann spurður að því hvað hann hefði verið að gera þarna á borðinu. Svaraði David því með dramatískum hætti að hann neytti alls ekki fíkniefna. „Thomas [gítarleikarinn Thomas Raggi] braut glas. Ég neyti ekki fíkniefna. Gerðu það, ekki segja þetta. Ekki segja þetta. Ekki kókaín. Ekki segja þetta,“ var svar Davids við spurningu blaðamannsins. Myndbandið af litríkum viðbrögðum Davids má sjá hér að neðan.

Kröfuharður götudómstóll samfélagsmiðla virðist ekki vera að kaupa útskýringar Davids á athæfi sínu og loga samfélagsmiðlar enn, og hafa gert frá því í gær. Ein spurði hvort David væri svona hrikalega hæfileikaríkur að hann gæti tínt upp glerbrot með tánum en sagði svo: „En hver þrífur glerbrot með tánum eiginlega?“

Bandið svaraði því seinna til á Instagram að þeir strákarnir væru tilbúnir til þess að gangast undir fíkniefnapróf til þess að kveða sögusagnirnar niður fyrir fullt og allt. „Við erum tilbúnir til þess að gangast undir fíkniefnapróf, því við höfum ekkert að fela,“ skrifaði bandið á Instagram reikninginn sinn.