Tori Ann Lyla Hunter, 27 ára gömul móðir frá Ástralíu, opnar sig í samtali við Jam Press um það hvernig það er að starfa við það að birta myndir af sér á vefsíðunni OnlyFans. The Sun vakti athygli á málinu.

OnlyFans er miðill sem gerir notendum kleift að selja efni sitt til áskrifenda gegn mánaðarlegu gjaldi. Klámstjörnur eru vinsælar á miðlinum en einnig áhrifavaldar sem selja djarfar myndir af sér. Aðdáendur geta einnig sent notendum skilaboð og lagt fram beiðni um myndefni gegn gjaldi. OnlyFans hefur verið mikið í umræðunni upp á síðkastið hér á landi og úti í heimi.

Í fyrra vann Tori Ann sem barþjónn og fékk þar um 2.600 íslenskar krónur á tímann. Þá ákvað hún að stofna aðgang á OnlyFans og í dag græðir hún um hálfa milljón í íslenskum krónum á viku. Hún hefur eytt um 5 milljónum í íslenskum krónum í lýtaaðgerðir en hún telur að það hafi hjálpað henni að fá meiri hagnað í gegnum miðilinn.

Tori Ann talar um hvernig það er að vera móðir á OnlyFans en hún á tvö börn, 8 ára gamlan strák og 6 mánaða gamla stúlku. Hún segist vera orðin þreytt á neikvæðninni í netverjum. „Mér finnst gaman að gera efni og mér finnst gaman að vera ber að ofan. Af hverju ætti ég ekki að græða á því sem ég elska að gera?“ segir hún.

„Nú hef ég meira fjárhagslegt frelsi og ég elska að geta gert hvað sem ég vil, hvenær sem ég vil með fjölskyldunni minni,“ segir Tori Ann og bendir á að aðaláhyggjuefni netverja sé hvað börnin hennar muni hugsa þegar þau verða eldri.

„Ég hef ekki áhyggjur af því vegna þess að ég er ekki að ala upp börnin mín í að vera þröngsýn. Stelpan mín er bara barn og sonur minn er ánægður því peningurinn sem ég fæ gerir það að verkum að hann getur fengið allt það sem hann vill. Hann kallar mig líka fallega á hverjum degi og er stoltur þegar ég sæki hann í skólann – svo ég finn ekki fyrir því að hann skammist sín fyrir mig.“