Fiskflutningabíll valt á Suðurlandsvegi við Lækjarbotna á fjórða tímanum í nótt. Um var að ræða vörubifreið með eftirvagn. Engin slys urðu á fólki. Farmurinn, fiskur og slor, dreifðist um veginn og utan vegar. Krana þurfti til að koma bílnum aftur á réttan kjöl og Vegagerðin var fengin til að senda saltbíl á vettvang en mikil hálka var á vettvangi. Björgunarsveit var einnig kölluð út til aðstoðar við verðmætabjörgun.

Á tíunda tímanum var akstur réttindalauss ökumanns stöðvaður í Kópavogi. Maðurinn reyndist eftirlýstur og var því handtekinn og vistaður í fangageymslu.

Tveir ökumenn voru handteknir í gærkvöldi og nótt, grunaðir um að vera undir áhrifum fíkniefna. Annar þeirra er einnig grunaður um vörslu fíkniefna og hinn um ítrekaðan akstur sviptur ökuréttindum.

Einn ökumaður var kærður fyrir of hraðan akstur á þriðja tímanum í nótt. Hraði bifreiðar hans mældist 141 km/klst á Kringlumýrarbraut en þar er leyfður hámarkshraði 80 km/klst.