Fréttablaðið skýrir frá þessu í dag. Haft er eftir Benjamín Magnússyni, arkitekt, að þarna virðist vera blómleg viðskipti. Hann er á meðal þeirra sem vilja að yfirvöld grípi til aðgerða til að vinna bug á fíkniefnaviðskiptum á svæðinu.
Á fundinum var áhersla lögð á að þörf sé á góðu myndavélaeftirliti og góðri lýsingu á svæðinu til að hægt sé að sporna við þessu. Fréttablaðið hefur eftir Benjamín, sem hefur rekið arkitektastofu í Hamraborg um árabil, að þetta sé ekki nýtt vandamál. „Maður sér að það kemur einn bíll og bíður og svo kemur enn f lottari bíll og það eru opnaðir gluggar og eitthvað gengur á milli áður en farið er hvort í sína áttina,“ sagði hann um dæmigerð viðskipti.
Hann sagðist hafa hitt fulltrúa þáverandi minnihluta bæjarstjórnar Kópavogs fyrir fimm árum og hafi lýst þungum áhyggjum af stöðu mála. „Ég stakk upp á því að það yrðu settar upp myndavélar því þær hafa fælingarmátt. Þau sögðu að það yrði athugað, en síðan eru liðin fimm ár og það er ekki ein einasta myndavél komin upp,“ er haft eftir honum.
Hann sagði einnig að lögreglan hafi einnig verið látin vita og að hún láti stundum sjá sig. „Hamraborgin er örugglega eitt stærsta dópsölumarkaðssvæði landsins,“ hefur Fréttablaðið eftir öðrum atvinnurekanda í Hamraborg. Hann sagðist næstum daglega verða vitni að því að fíkniefnasalar mæti á svæðið með umslög fyrir viðskiptavini. Ástandið sé mjög slæmt og börn niður í 12 ára séu að sprauta sig í bílageymslunum.
