Hertar sóttvarnaaðgerðir tóku gildi í Sydney í Ástralíu á miðnætti að staðartíma. Tilgangurinn er að gera út af við nýja bylgju kórónuveirunnar fyrir jól. Nú hafa reglur um hversu margir mega safnast saman verið hertar sem og um dans og söng.

Gladys Berejiklian, forsætisráðherra New South Wales þar sem Sydney er, sagði í gær að frá því að þessi nýja bylgja hafi uppgötvast fyrir þremur dögum og síðan hafi 68 smit greinst, þar af 30 í norðurhluta Sydney.

Af þessum sökum er gripið til hertra sóttvarnaráðstafana í Sydney og nú mega að hámarki 10 manns koma saman. Hvað varðar fólksfjölda innanhúss þá má vera ein manneskja á hverja fjóra fermetra og að hámarki 300 manns. Í brúðkaupum mega að hámarki 20 manns dansa í einu og bannað er að syngja á íþróttaviðburðum.

Aðgerðirnar verða endurmetnar á miðvikudaginn og þá verður ákveðið hvernig þeim verður háttað um jólin.