Dómar voru kveðnir upp í Héraðsdómi Reykjavíkur í gær yfir þremur eigendum verslunarinnar Finnska búðin sem meðal annars var starfrækt á Laugavegi og í Kringlunni en varð gjaldþrota árið 2019. Þrotabú fyrirtækisins krafðist þess að rift yrði meintun gjafagerningi við eigendurna þrjá og voru kröfur þrotabúsins samþykktar fyrir dómi að mestu leyti.

Riitu Anne Maari Kaipainen var sögð hafa fengið greiddar tæplega fjórar milljónir í átta greiðslum á tímabilinu 10. desember 2018 til 6. febrúar 2019. Dómurinn rifti greiðslunum og Riitu var dæmd til að endurgreiða þrotabúinu upphæðina. Þá þarf hún að greiða 650.000 í málskostnað.

Annar eigandi búðarinnar, Satu Liisu Maria Raemö, var krafin um endurgreiðslu á 3 milljónum í þrotabúið. Um var að ræða tvær millifærslur, aðra frá desember 2018 og hina frá janúar 2019. Var þessum greiðslum rift og stefnda dæmd til að endurgreiða þrotabúinu upphæðina auk 650.000 króna í málskostnað.

Þriðji eigandinn er Piia Susanna Meeaeleae. Krafist var riftunar á meintum gjafagjörningi til hennar sem fram fór með kaupum á 26 gjafakortum frá Landsbankanum að upphæð 1.690.000 krónur. Þá var krafist riftunar og endurgreiðslu á millifærslum frá Finnsku gjafabúðinni til Piiu að upphæð tæpar 3 milljónir.

Niðurstaða dómsins var að Piia var sýkn af kröfu um riftun á kaupum á gjafakortunum. Hins vegar var rift millifærslum Finnsku gjafabúðarinnar til hennar upp á samtals tæplega 3 milljónir króna og þarf hún að endurgreiða þrotabúinu þá upphæð. Málskostnaður var hins vegar felldur niður í máli Piiu.