Úrval Útsýn hefur fellt niður öll bein flug til Tenerife og Kanarí frá 19. desember til 31. janúar. Þetta kemur fram í fréttatilkynningu frá félaginu.

„Þessi ákvörðun var tekin sökum þess að aðstæður á eyjunum eru ekki eins og þær venjulega eiga að vera á sólaráfangastöðum okkar. Eins var ekki hægt að tryggja nægilega þátttöku í þessum flugum. Þetta eru aðstæður sem eru okkur að öllu óviðráðanlegar,“ segir í tilkynningunni.

„Við höfðum haldið í vonina um að aðstæður myndu breytast til hins betra með komandi tíma, en nú er verið að herða reglurnar á Kanaríeyjunum og því aðstæður þar ekki beint spennandi fyrir viðskiptavini okkar,“ segir enn fremur.

Haft hefur verið samband  við alla þá viðskiptavini sem eiga bókað út á þessum tíma.

„Þrátt fyrri niðurfelld bein flug til Tenerife og Kanarí höldum við áfram að aðstoða fólk með ferðirnar sínar um allan heim,“ segir enn fremur í tilkynningu frá Úrval Útsýnar.