Matvælastofnun ætlar að hefja skimun fyrir kórónaveiru á minkabúum á Íslandi vegna smita af stökkbreyttu afbrigði veirunnar úr minkum í fólk í Danmörku. Ekki er grunur um kórónaveirusmit á minkabúum hérlendis. Litlar líkur eru taldar á smiti hjá villtum minnkun þar sem umgengni milli þeirra og manna er í lágmarki. Tilkynning um málið frá Matvælastofnun er eftirfarandi:

„Í ljósi smita af stökkbreyttu afbrigði kórónaveiru úr minkum í fólk í Danmörku ætlar Matvælastofnun að hefja skimun fyrir kórónaveiru á minkabúum landsins. Ekki er grunur um að kórónaveirusmit hafi komið upp á minkabúum hérlendis.

Þegar fregnir bárust af kórónaveirusmiti úr fólki í minka í sumar sendi Matvælastofnun tilmæli til íslenskra minkabænda um hertar sóttvarnir á búunum og að einstaklingar með sjúkdómseinkenni haldi sig fjarri þeim. Tilkynna skal grun um veikindi í minkum til Matvælastofnunar. Reglulega hefur verið minnt á þessi tilmæli en engar tilkynningar hafa borist.

Ef smit greinist á búunum verða frekari aðgerðir skoðaðar í samráði við heilbrigðisyfirvöld.

Í gær greindu Danir frá niðurskurði á öllum minkum á minkabúum í Danmörku vegna kórónaveirusmita sem bárust úr minkum í fólk. Um stökkbreytt afbrigði veirunnar er að ræða sem talið er að hafi borist upprunalega úr fólki í minka. Hætta er á að þau bóluefni sem eru í þróun gegn kórónaveirunni virki ekki á stökkbreytt afbrigði veirunnar.

Litlar líkur eru á smiti yfir í villta minkastofninn þar sem umgengni við menn er í lágmarki.

Á Íslandi eru starfrækt 9 minkabú á Norðlandi vestra og Suðurlandi með alls 15.000 eldislæðum.“