Landsréttur vísaði í gær frá kröfu konu sem Héraðsdómur Reykjaness hafði úrskurðað í farbann til 2. nóvember. Krafðist konan ógildingar úrskurðarins. Landsréttur vísaði málinu frá á þeim forsendum að kæran hefði borist of seint.
Héraðsdómur kvað upp sinn úrskurð um farbann þann 5. október. Konunni er gefið að sök að hafa smyglað til landsins rúmlega 400 grömmum af kókaíni í félagi við aðra konu. Konurnar voru með efnin innvortis. Vanaleg aðferð við það er að gleypa efnin í smokkum, taka inn laxerandi efni síðar og skila efnunum út með hægðum.
Konurnar komu til landsins frá Brussel. Játuðu þær báðir brot sín skýlaust. Í úrskurði Héraðsdóms kom fram að ákæruvaldið hefði rökstuddan grun um að konan sem kærði gæsluvarðhaldsúrskurðinn myndi reyna að strjúka úr landi, leynast og koma sér undan réttarhöldum.
Við rannsókn á símum kvennanna komu í ljós tengsl við íslensk símanúmer. Var um að ræða aðila sem þær sögðust hafa hitt í Belgíu. Lögreglan hefur rökstuddan grun um að þetta fólk tengist innflutningnum á fíkniefnunum.
Allt á það eftir að skýrast betur síðar en rannsókn lögreglu er sögð á lokastigi. Ljóst er að konurnar verða í farbanni til 2. nóvember hið minnsta.