Lögreglan á Norðurlandi eystra lýsir eftir Ílónu Steinunni Körting Kristinsdóttur, 30 ára, sem býr á Akureyri. Hún er um 170 sm á hæð, í meðallagi vaxin, með dökkt axlarsítt hár og með húðflúr á aftanverðum hálsi við hægra eyrað. Hún er líklega klædd í dökkan fatnað, dökkan jakka, gráar buxur, með ljósa prjónahúfu og svarta skó með hvítum botni.

Fjölmennt lið leitar að henni en björgunarsveitir allt frá Siglufirði austur til Húsavíkur voru kallaðar út til leitar í gærkvöldi og hófst leit um miðnætti. RÚV skýrir frá þessu.

Lögreglan segir líklegt að Ílóna hafi verið á leið frá Akureyri til Húsavíkur í gærkvöldi. Lögreglan biður fólk, sérstaklega þá sem voru á þessari leið á milli klukkan 19.20 og 21.00 í gærkvöldi og hittu Ílónu mögulega að hafa strax samband við lögregluna í síma 112.