Listi Einars Hermannssonar varð ofaná í kosningum á aðalfundi SÁÁ rétt í þessu. Það voru 490 atkvæði greidd. Mótframbjóðandi Einars var Þórarinn Tyrfingsson, fyrrverandi formaður samtakanna.

Listi stuðningsmanna Einars hafði betur bæði í kosningu í stjórn og í varastjórn. Samkvæmt heimildum DV var Einar með um það bil 280 atkvæði af þessum 490.

Kosningarnar eru þannig að á fundinum kjósa fundargestir milli tveggja lista af mögulegum stjórnarmeðlimum sem formannsframbjóðendurnir leggja til. Eftir fundinn kýs stjórnin síðan formann. Á hverjum aðalfundi eru kosnir 16 inn í aðalstjórnina þar sem alls eru 48 manns.

Nokkrar þjóðþekktar manneskjur eru á lista Einars og eru því komin í stjórn SÁÁ. Þar má nefna Frosta Logason, Steinunni Valdísi Óskarsdóttur og Þóru Kristínu Ásgeirsdóttur. Frosti var atkvæðahæstur í kosningunum.

Aðdragandi kosninganna hefur verið erfiður, en hann hefur einkennst af átökum á milli stuðningsmannahópanna.

Tónlistarmaðurinn Bubbi Morthens, sem áður hafði lýst yfir stuðningi við Einar, tjáði sig um úrslit kosningana í við blaðamann DV:

“Mjög ánægður með niðurstöðuna, en það má aldrei gleyma frumkvöðlastarfsemi Þórarins, aldrei gleyma því.”