Lítið hefur selst af lúxusbílum í heimsfaraldri kórónuveiru og nú bregðast bresku bílaframleiðendurnir Aston Martin, Bentley og McLaren við þessu með því að segja mörg þúsund manns upp störfum. Á síðustu tveimur vikum hafa fyrirtækin tilkynnt að rúmlega 3.000 manns verði sagt upp.

CNN skýrir frá þessu. Á föstudaginn tilkynnti Bentley að 1.000 manns verði sagt upp eða um fjórðungi starfsmanna fyrirtækisins. Á fimmtudaginn tilkynnti Aston Martin um uppsagnir 500 starfsmanna. Í lok maí tilkynnti McLaren um uppsagnir 1.200 starfsmanna.

Lúxusbílaframleiðendurnir hafa ekki átt góða daga síðustu ár. Brexit hefur hangið yfir höfðum þeirra og eftirspurnin og salan hefur dregist saman. Ekki bætir heimsfaraldur kórónuveiru úr skák.