Geir Þorsteinsson, framkvæmdarstjóri ÍA blæs á þær sögusagnir um að Hörður Ingi Gunnarsson sé að ganga í raðir FH.
Hrafnkell Freyr Ágústsson sagði frá því í Dr Football líkur væri á að Hörður væri að fara heim í FH. FH hefur lengi haft áhuga á að fá Hörð.
Geir segir ekkert til í því. „Það eru engar viðræður um leikmannakaup í gangi við önnur félög,“ sagði Geir í samtali við mbl.is.
„Ég hef heyrt þessar sögur um FH og Hörð Inga og hún var í gangi áður en ég tók við framkvæmdastjórastarfinu upp á Skaga. Ég get hins vegar staðfest það að það er enginn leikmaður á förum frá Akranesi.“
FH er að skoða markaðinn en í Dr Football kom fram að Emil Hallfreðsson gæti samið við félagið.