Á ellefta tímanum í gærkvöld var tilkynnt um ungan mann í Breiðholti sem var að hóta nágranna sínum með eggvopni. Ungi maðurinn var handtekinn og vistaður fyrir rannsókn málsins í fangageymslu lögrelgu.

Þetta kemur fram í Dagbók Lögreglunnar á höfuðborgarsvæðinu. Þar segir einnig frá því að par var handtekið í Grafarvogi í gærkvöld, grunað um ræktun fíkniefna og var fólkið vistað fyrir rannsókn málsins í fangageymslu lögreglu. Plöntur og tæki voru gerð upptæk.

Laust fyrir klukkan tíu í gærkvöld var tilkynnt um varðeld við Hvaleyrarvatn. Erlent fólk var þarna að verki og sögðust þau ekki hafa vitað að þetta væri bannað og slökktu strax eldinn.

Laust fyrir klukkan tíu í gærkvöld var tilkynnt um þjófnað úr verslun í hverfi 108. Maður var stöðvaður er hann var að yfirgefa verslunina með fulla innkaupakerru af vörum að andvirði u.þ.b. 120.000 kr.