Icelandair er tæknilega séð gjaldþrota og það orkar tvímælis að nota lífeyrisjóði almennings til að halda fyrirtæktinu á lífi. Þetta segir Ragnar Þór Ingólfsson formaður VR. Hann segir stjórnvöld verða að standa við kjarasamningsbundin loforð gagnvart almenningi áður en sparifé er eytt í hlutabréfakaup í Icelandair.

Þetta kom fram í hádegisfréttum RÚV.

Líkt og áður hefur komið fram þá stefnir Icelandair að því að auka hlutafé sitt um tæpa 30 milljarða með almennu hlutafjárútboði. Nýjir fjárfestar og almenningur munu þá sitja við sama borð og núverandi hluthafar.

Tæplega helmingur hlutafjár í Icelandair er í eigu íslenskra lífeyrissjóða.  Lífeyrissjóður verslunarmana er næst stærsti hluthafinn í Icelandair, með 12 prósent eignarhlut.

Í samtali við RÚV segir Ragnar Þór að aukin fjárfesting verslunarmanna í Icelandair verði að vera háð ákveðnum skilyrðum.

„Ég mun gera kröfu og beita mér að fullum krafti fyrir því að það verði ekki sett króna í slíkan pakka fyrr en búið er að ganga frá kjarasamningsbundum loforðum stjórnvalda við almenning , og koma með raunverulegan björgunarpakka sem mun grípa fólkið okkar sem er að missa vinnuna og fer á strípaðar atvinnuleysisbætur núna í haust.“

Ragnar telur einnig að ekki hafi verið gert  nægilega mikið fyrir islenskt launafólk í þeim þrengingum sem nú steðja að. Það verði að ganga í málin í þessum mánuði.

„Lífskjarasamningurinn mun ekki halda, og að öllum líkindum falla vegna þess að stjórnvöld hafa ekki staðið við sitt gagnvart almenningin og verkalýðshreyfingum,“ segir Ragnar jafnframt og bætir við að að ekki sé hægt að nota lífeyrissjóðina eins og opið seðlaveski handa fyrirtækjunum í landinu.