Kórónuveirusmit í Þýskalandi eru aftur á uppleið eftir að tilslakanir á samkomubanni tóku gildi. Sökum þess fær þýski fótboltinn ekki að fara af stað 9 maí eins og áætlað var.
Búið er að fresta deildinni um viku hið minnsta en staðan verður metinn á hverjum degi. Alfreð Finnbogason landsliðamaður í knattspyrnu segir ástandið í landinu gott.
Hann og félagar hans í Augsburg hafa hafið æfingar og vonir standa til um að allt fari af stað innan tíðar.
„Þjóðverjarnir eru búnir að leggja fram 20 manna læknateymi og teymi af sérfræðingum sem settu upp ákveðin ramma í kringum leikina sem verða spilaðir, þeir verða auðvitað spilaðir án áhorfenda. Þeir segjast vera 100% tilbúnir. Það vantar bara núna að pólitíkin gefi grænt ljós á að það megi fara að spila. Það meikar ekkert sens ef fólk þarf að halda tveggja metra fjarlægð á almannafæri en við að spila fótbolta. Þannig að það þarf að vera smá samræmi í þessu,“ sagði Alfreð við Rúv.
„Maður verður bara að horfa á það jákvæða. Maður er að nýta góða veðrið hérna og að geta verið að æfa tel ég vera ákveðin forréttindi. Í flestum löndum í kring, á Englandi, Spáni og auðvitað á Íslandi er ekki verið að æfa. Þannig að ég er þakklátur fyrir að vera í landi eins og Þýskalandi þegar eitthvað svona skellur á. Maður sér hvað það er mikið skipulag og hvað þeir tækla hlutina af mikilli alvöru og fagmennsku.”