Tvær kærur eru til meðferðar hjá kærunefnd jafnréttismála vegna ráðningar Stefáns Eiríkssonar sem útvarpsstjóra.  RÚV greinir frá.

Ákvörðun stjórnar Ríkisútvarpsins um að birta ekki lista yfir nöfn umsækjenda um stöðuna var kærð til úrskurðarnefnda upplýsingamála. Nefndin kvað þó Ríkisútvarpinu óskylt að birta slíkan lista þar sem starfsmenn RÚV teljist ekki opinberir starfsmenn.

Meðal umsækjenda um starfið voru Kolbrún Halldórsdóttir og Kristín Þorsteinsdóttir og óskuðu þær báðar eftir rökstuðning. Slíkan rökstuðning fengu þær þó ekki, þar sem RÚV er opinbert hlutafélag og því gildi reglur stjórnsýsluréttar ekki um störf fyrir RÚV að sama marki og þær gilda um starfsmenn sem teljast opinberir.

Ekki hefur komið fram hvaða umsækjendur um stöðu útvarpsstjóra standa að baki þeim kærum sem til meðferðar eru hjá kærunefnd jafnréttismála en umsækjendur voru í heildina 41. En miðað við eðli starfa kærunefndar jafnréttismála má ætla að um sé að ræða umsækjendur sem telja sig búa yfir að minnsta kosti sömu hæfni og Stefán Eiríksson, ef ekki meiri.