Dönsk heilbrigðisyfirvöld tilkynntu í morgun að 32 Danir hafi látist af völdum COVID-19 kórónuveirunnar. Í gær höfðu 24 látist svo aukningin er umtalsverð á milli daga. 301 liggja nú á sjúkrahúsi smitaðir af veirunni, þar af eru 69 á gjörgæslu og 58 af þeim í öndunarvél.

1.577 smittilfelli hafa verið staðfest og hafði fjölgað um 127 frá í gær. Gengið er út frá því að miklu fleiri séu smitaðir því ekki eru tekin sýni úr öllum þeim sem sýna sjúkdómseinkenni. Fram að þessu hafa 13.756 gengist undir sýnatöku.

Í Færeyjum hafa sýni verið tekin úr 2.482 og hafa 122 greinst með smit. Á Grænlandi hafa 194 sýni verið tekin og fjórir hafa greinst með smit.