DV ræddi við Sigurjón Erni hjá Sportvörum, sportvorur.is, og Gunnar hjá Hreysti, hreysti.is.
Sigurjón Ernir segir að brjálæðið hafi byrjað í síðustu viku. Á miðvikudaginn og fimmtudaginn síðastliðinn hafi pantanirnar aukist en á föstudaginn fóru þær upp úr öllu valdi. Á föstudaginn var tilkynnt um samkomubann sem tók gildi í dag.
„Það er aðallega verið að kaupa búnað til að gera æfingar heima fyrir. Mikið af ketilbjöllum, handlóðum, dýnum, teygjum og fleira í þeim dúr,“ segir Sigurjón.
Vinsælustu þyngdirnar í ketilbjöllum eru uppseldar í Sportvörum, Hreysti og fleiri sportverslunum.
„Við erum með varann á okkur. Sjálfur er ég ekki inn í verslun. Við erum með þrjá starfsmenn sem eru mest heimavinnandi. Það er til að ef fólki í versluninni veikist þá getum við komið inn í staðinn,“ segir hann.
Hátt í hundrað netpantanir biðu þeirra í Sportvörum í morgun sem starfsfólk vinnur nú hörðum höndum við að afgreiða.
Gunnar, starfsmaður hjá Hreysti, hafði sömu sögu að segja og Sigurjón Ernir:
„Við teljum þetta bara í tonnatali sem fer hérna út,“ segir hann.
„Það sem er vinsælast eru ketilbjöllur, handlóð og æfingateygjur. Í raun allt það sem fólk notar þegar það er heima að brasa.“
Aðspurður hvort það sé von á nýrri sendingu á ketilbjöllum segir hann að fyrirtækið sé búið að panta og vonast hann eftir sendingu í næstu viku. Ef ekki þarnæstu viku.
Sigurjón Ernir er sjálfur mikill íþróttamaður. Han kom heim frá Kanarí í síðustu viku eftir að hafa lokið 128 kílómetra hlaupi þar.
Sigurjón heldur úti Facebook-síðunni Fjarþjálfun Sigurjóns Ernis og deildi nýlega færslu með fjórum heimaæfingum sem allir geta gert. Fólk þarf ekki að vera með jafn flotta aðstöðu eins og hann er með í bílskúrnum heima. Þetta eru tvær hlaupaæfingar og tvær styrktaræfingar sem þú getur skoðað í færslunni hér að neðan.
