Örfáum klukkustundum eftir dauða Kobe Bryant í þyrluslysi á sunnudagskvöld tísti Felicia tengli á frétt Daily Beast um nauðgunarmál Bryant frá árinu 2003.
Kobe Bryant var sakaður um nauðgun árið 2003 af nítján ára stúlku í Colorado. Stúlkan sem um ræðir var starfsmaður á hóteli og átti hin meinta nauðgun sér stað áður en Kobe gekkst undir aðgerð á hné. Kobe var handtekinn og ákærður vegna málsins og mætti fyrir dóm.
Sjálfur neitaði hann sakargiftum og var málið látið niður falla þegar stúlkan neitaði að bera vitni. Kobe játaði þó að hafa verið ótrúr eiginkonu sinni og þá er hann sagður hafa komist að samkomulagi við stúlkuna um að leysa málið án aðkomu dómstóla. Upplýsingar um hvað fólst í þessu samkomulagi voru þó aldrei gerðar opinberar.
Óhætt er að segja að tíst Feliciu hafi vakið athygli og fékk hún yfir sig holskeflu af gagnrýni, en auk þess var henni hótað ofbeldi og lífláti. Í kjölfarið var ákveðið að víkja henni frá störfum á fréttastofu Washington Post meðan skoðað var hvort hún hefði brotið reglur blaðsins með tístinu.
Nú liggur niðurstaða fyrir og segir Tracy Grant, ritstjóri Washington Post, að þó tíst Feliciu hafi verið óheppilegt hvað tímasetningu varðar hafi hún ekki brotið neinar reglur. Um 400 starfsmenn Washington Post höfðu áður skrifað undir áskorun þess efnis að Felicia fengi að koma aftur til starfa. Sögðu þeir að miðillinn ætti að sýna henni stuðning í ljósi alvarlegra hótana sem hún hafði fengið.
