Bolton skýrði frá þessu á mánudaginn. Þetta er sannkölluð sprengja inn í málið en þetta hvarf þó svolítið í umræðunni vegna umfjöllunar um spennuna á milli Bandaríkjanna og Írans.
Bolton, sem er 71 árs, hefur mikla þekkingu á utanríkismálum og talsmaður harðrar utanríkisstefnu. Hann hefur lýst yfir efasemdum um eitt og annað í utanríkisstefnu Trump, þar á meðal viðræður hans við einræðisherrann í Norður-Kóreu um kjarnorkuafvopnunarmál.
Bolton var lykilmaður í ákvarðanatökunni í Hvíta húsinu á þeim tíma sem ákæran nær til. Trump er ákærður fyrir að hafa beitt forseta Úkraínu þrýstingi til að láta gera opinberar rannsóknir sem áttu að beinast að andstæðingum Trump í demókrataflokknum. Til að þrýsta á forsetann var hernaðaraðstoð til Úkraínu fryst og fyrirheit gefin um eitt og annað pólitískt jákvætt, til dæmis fund með Trump í Hvíta húsinu. Talið er að Bolton viti margt um þetta.
Lögmaður hans, Charles Cooper, sagði í nóvember að Bolton hafi „tekið þátt í mörgum fundum og samtölum og öðru tengdu Úkraínumálinu, það á meðal mörgum fundum og samtölum sem enn hefur ekki verið skýrt frá“.