Barnaníðingur sem var í haust dæmdur í sjö ára fangelsi í Héraðsdómi fyrir margendurtekin kynferðisbrot gegn syni sínum fór ásamt öðrum syni sínum í skólaferðalag í skólabúðirnar í Reykjaskóla, á meðan að mál hans var í rannsókn. Stundin greinir frá þessu.

DV fjallaði um mál mannsins í október, en samkvæmt dómi á maðurinn að hafa margsinnis brotið á syni sínum er hann var 4 til 11 ára gamall. Ofbeldið var virkilega alvarlegt. Hann á bæði að hafa káfað á drengnum, látið drenginn káfa á sér. Auk þess hafði hann oft nauðgað drengnum í endaþarm. Vegna ofbeldisins hrjáðist drengurinn mikið. Það var ekki fyrr en sonurinn varð fullorðin að hann kærði málið.

Í nýjasta tölublaði Stundarinnar kemur fram að þessi sami maður hafi farið í skólaferðalag ásamt yngri, ólögráða syni sínum, á meðan að rannsókn á máli hans stóð yfir. Skólaferðalagið var í skólabúðunum að Reykjum, en þangað fara gjarnan nemendur í 7. bekk í grunnskóla og dvelja í fimm daga.

Svo virðist vera að ekki hafi verið vitneskja um málið hjá skólanum, eða hjá foreldrum hinna barnanna fyrr en ferðinni var lokið. Einn foreldri barns í skólanum sagði að málið virtist koma fólki á óvart.

„Ég veit allavega af einhverjum foreldrum sem að þetta kom á óvart og þeir voru ekki sáttir við þetta. Eftir því sem ég best veit var skólastjóri heldur ekki sáttur við þetta. Þetta kom skólastjórnendum mjög á óvart þegar þeir lásu þetta í blaðinu. Ég hef heyrt að þeir hafi ekki reiknað með neinu svona.“

Í nóvember áfrýjaði maðurinn dómnum til Landsréttar, en það mun tefja málið um nokkra mánuði, jafnvel ár. Maðurinn mun ekki sæta gæsluvarðhaldi vegna brota sinna, þar sem að lögregla úrskurðaði hann ekki í gæsluvarðhald á meðan að rannsókn hennar á málinu fór fram.