Elstu ferðaskrifstofu heims, Thomas Cook, hefur nú verið bjargað að vissu leyti. Kínverska fyrirtækið Fosun hefur keypt nafn fyrirtækisins og greiddi 11 milljónir punda fyrir það.

The Guardian skýrir frá þessu. Fosun var stærsti hluthafinn í Thomas Cook fyrir gjaldþrotið. Tilkynnt var um kaupin á föstudaginn. Með í kaupunum fylgja hótelnöfnin Casa Cook og Cook‘s Club. Auk þess fær Fosun yfirráðarétt yfir öllum heimasíðum samsteypunnar, reikningum á samfélagsmiðlum og tölvubúnaði.

Thomas Cook var stofnað 1841 en varð nýlega gjaldþrota eftir að hafa skuldsett sig gríðarlega við að reyna að stækka enn frekar og yfirtaka rekstur samkeppnisaðila.