Dagbjört Barringer, sem er búsett í Washingtonfylki í Bandaríkjunum, varð vitni af skotárás í Southcenter verslunarmiðstöðinni, en þar starfar hún sem förðunarfræðingur. Dagbjört segir í samtali við DV enn vera í sjokki og ekki alveg búin að jafna sig eftir áfallið. „Síðan þetta gerðist hef ég sofið meira en fjóra tíma. Ég man allt í móðu,“ segir Dagbjört.

Bandarískir fjölmiðlar greina frá því að engan skaðaði í árásinni en karlmaður skaut úr byssu í Southcenter verslunarmiðstöðinni á laugardaginn rétt fyrir klukkan níu að kvöldi. Verslunarmiðstöðin var rýmd en maðurinn hefur ekki enn verið handtekinn.

Dagbjört segist enn vera að vinna úr áfallinu. „Líðan er óskýr, ég er annaðhvort með mikinn galsa og fliss eða lítil í mér og leið. Ég finn að ég er ennþá að vinna úr áfallinu, ég skelf og hugsanir eru í móðu. Svo inn á milli finnst mér ég vera alger bjáni að líða svona því það var enginn skotinn,“ segir Dagbjört.

Dagbjört greindi frá upplifun sinni innan Facebook-hópsins Sögur af dónalegum viðskiptavinum í gær. „Í gær var unglingur í verslunarmiðstöðinni minni reiður, dró upp byssu og hleypti af. Ég er að vakna úr lyfjamókinu (var gefið róandi til að geta sofið) og það fyrsta sem ég hugsaði var að ég held ég geti aldrei farið aftur í vinnuna, annað var að ég er búin að vinna þennan hóp. Versti viðskiptavinur allra tíma er fundinn,“ skrifaði Dagbjört. Hún segir í samtali við DV að hún fari þó í vinnuna á morgun.