Í síðustu viku kvað dómstóll í Nykøbing Falster í Danmörku upp tímamótadóm. 21 árs karlmaður var þá fundinn sekur um að hafa beitt fyrrum unnustu sína andlegu ofbeldi. Hann braut gegn henni og niðurlægði með þessu ofbeldi að mati dómsins.

Ákvæði, sem gerir verknað sem þennan refsiverðan, var bætt við dönsku hegningarlögin í byrjun apríl á þessu ári. Brot mannsins stóðu yfir frá byrjun apríl og fram í miðjan júlí.

Danska ríkisútvarpið segir að samkvæmt ákæruskjalinu hafi maðurinn brotið sjálfsmynd konunnar niður með niðurlægjandi framkomu og orðum. Þetta hafi að lokum orðið til þess konan taldi þetta vera sína sök.

Lotte Nielsen, saksóknari, sagðist sérstaklega ánægð með að maðurinn var sakfelldur fyrir andlegt ofbeldi. Það sendi sterk skilaboð um að andlegt ofbeldi sé einnig talið alvarlegt.

Maðurinn var dæmdur í tveggja og hálfs árs óskilorðsbundið fangelsi. Ekki er skilgreint í dómnum hversu stór hluti refsingarinnar er vegna andlega ofbeldsins. Hann var einnig sakfelldur fyrir að hafa beitt konuna líkamlegu ofbeldi.