Skúli Mogensen, forstjóri WOW air, hefur staðfest að félagið muni hefja flug til Asíu á næsta ári. Þetta kemur fram í viðtali við Skúla í Markaðnum í dag.

„Ég er ekki enn tilbúinn að ljóstra upp um hvaða staði við erum þar að horfa til en þar er um að ræða flug til fjarlægari landa en við höfum fram til þessa verið að fljúga til,“ segir Skúli meðal annars í viðtalinu en meðal þeirra áfangastaða sem gera má ráð fyrir að komi til greina eru Kína og Japan meðal annars.

„Þegar það gerist munum við sjá, rétt eins og gerðist þegar við hófum beint flug til Kaliforníu, gríðarlega aukningu þaðan í ferðamannastraumi til Íslands. Ég get fullyrt það,“ segir Skúli.

WOW fær fjórar nýjar Airbus A330neo-vélar afhentar á næsta ári og er flugdrægni þeirra mikil, eða rúmir tólf tímar.

Skúli segir í viðtalinu að nú sé unnið að því að ákveða hvaða áfangastaðir verði fyrir valinu. Hann kveðst þeirrar skoðunar að til að lifa af í harðri samkeppni muni flug til Asíu skipta miklu fyrir WOW air.