Hælisleitandi hér á landi hefur verið úrskurðaður í gæsluvarðhald til 9. ágúst fyrir fjölmörg brot, öll framin á þessu ári. Sum atvikin eru sérstaklega alvarleg en hann er meðal annars sakaður um að hafa hótað að drepa lögreglumann og hafa nefbrotið konu í Keiluhöllinni.

Maðurinn er sakaður um fjölmörg brot og snúast mörg þeirra um ýmsan þjófnað. Alvarlegust eru þó tvö atvik. Það fyrra átti sér stað í mars í Verslun Herragarðsins í Smáralind. Þar er maðurinn sagður hafa reynt að stela fatnaði að verðmæti um 130 þúsund krónur en var gómaður af starfsmönnum.

Hann er sagður hafa hótað þeim starfsmönnum lífláti en var handtekinn af lögreglu. Í lögreglubíl á leið frá Smáralind hótaði hann þeim lögreglumönnum lífláti og gott betur.

„[Maðurinn] hótað lögreglumanni lífláti með því að ætla að taka af honum höfuðið. Á leið á lögreglustöðina sagði kærði að honum hafi alltaf langað til þess að drepa kristna manneskju og þegar það yrði þá ætlaði hann að skera   höfuð   hennar   af   og   drekka   blóðið   úr   henni   því   til   fögnuðar   og   beindi   þeim   orðum   til lögreglumannsins  að  hann  gæti  orðið  fyrir  valinu  hjá  honum,“ segir í dómi.

Næsta atvik sem má telja sérstaklega alvarlegt átti sér stað í Keiluhöllinni ríflega mánuði síðar. Hann er sakaður um að hafa ráðist þar á konu, en í dómi kemur fram að hann hafi ekkert tengst þeirri konu.

Atvikinu er lýst svo í dómi: „Ráðist á A, klipið hana í vinstri kinn, slegið hana í andlitið með krepptum hnefa þannig að A féll niður, allt með þeim afleiðingum að hún hlaut nefbeinabrot, mar á hné og yfirborðsverka á höfði. Vitni kvaðst hafa séð kærða slá brotaþola með krepptum hnefa í andlitið.“

Líkt og fyrr er hann sagður hafa hótað lögreglumönnum lífláti þegar hann var handtekinn.

Lögreglustjóri fór fram á gæsluvarðhald yfir manninum og taldi yfirgnæfandi líkur séu á því að hann myndi halda áfram brotastarfsemi væri hann frjáls ferða sinna. Samkvæmt dómi rökstuddi lögreglustjóri það svo:

„Kærði sé hælisleitandi og eigi engan sakaferil hér á landi. Kærði hafi sýnt af sé grófa ofbeldisfulla hegðun  gagnvart  almennum  borgurum.  Hann  hafi  einnig  verið  ógnandi  og  hótað  lögreglumönnum  við afskipti sem og öryggisvörðum í búsetuúrræðinu sem hann er í. Hann hafi orðið uppvís að því að vera að leita sér að eggvopnum, skotvopnum og fíkniefnum frá því að hann hafi komið til landsins. Hann sé talinn vera  mjög  óútreiknanlegur  í  hegðun.“

Athygli vekur að héraðsdómur hafnaði þeirri kröfu þar sem dómari taldi allar líkur á því að maðurinn myndi fá skilorðsbundinn dóm þar sem hann ætti ekki að baki brotaferil hér á landi. Landsréttur var þó ekki sammála þeirri túlkun og var maðurinn því úrskurðaður í gæsluvarðhald til 9. ágúst næstkomandi.