Beitti fanga ofbeldi í maí í fyrra –
Rannsóknarlögreglumaðurinn, sem ákærður er fyrir líkamsárás og brot í opinberu starfi, játaði sök að hluta við þingfestingu málsins í Héraðsdómi Reykjavíkur. Hann neitaði því að um ásetning væri að ræða þegar hann veitti fórnarlambi sínu tvö höfuðhögg. Þá viðurkenndi maðurinn skaðabótaskyldu en samþykkti ekki að upphæðina sem fórnarlambið fór fram á, eða tvær milljónir króna. RÚV greinir frá
Atvikið átti sér stað síðastliðið sumar í fangaklefa á lögreglustöðinni við Hverfisgötu, nánar tiltekið 16.maí 2016. Gerðist það þegar verið var að flytja fórnarlambið úr fangaklefanum og fyrir dómara. Greint var frá því í mars á þessu ári að lögreglumaðurinn hefði verið ákærður.
Í ákæru kemur fram að lögreglumaðurinn hafi tekið um hálsmál fangans, sem þá var handjárnaður, og ýtt honum upp að vegg og keyrði hann síðan í gólfið. Þar setti lögreglumaðurinjn hægra hné sitt á bringu fangans, ógnaði honum með krepptum hnefa og skellti höfði hans í tvígang í gólfið. Síðan dró hann fangann eftir fangaganginum og að lyftu sem þar er. Árásin sást vel á eftirlitsmyndavélum.