Lögreglumaður í rannsóknardeild lögreglunnar á höfuðborgarsvæðinu hefur verið ákærður fyrir brot í starfi en hann er grunaður um að hafa beitt mann í haldi ofbeldi. Atvikið mun hafa átt sér stað síðastliðið sumar í fangaklefa á lögreglustöðinni við Hverfisgötu.
Þetta kom fram í kvöldfréttum Stöðvar 2 en þar kom einnig fram myndbandsupptökur væru til af atvikinu.
Mun maðurinn hafa verið á leið fyrir dóm í fylgd lögreglumannsins þegar ofbeldið átti sér stað. Atvikið er sagt sjást mjög vel á myndbandsupptökunni.
Lögreglumaðurinn er enn við störf hjá lögreglunni á höfuðborgarsvæðinu. Í yfirlýsingu frá lögreglu kemur fram að í janúar síðastliðnum hafi komið til álita hvort senda ætti lögreglumanninn í tímabundið leyfi vegna málsins en það hafi verið lögfræðilegt mat að það væri ekki fært þar sem of langur tími væri liðinn frá því að atvikið átti sér stað. Sú ákvörðun verður hins vegar endurskoðuð í ljósi útgáfu ákærunnar og er niðurstöðu að vænta á morgun.