„Bílasmiðja SGB var stofnuð þegar ég keypti húsnæðið á Ísafirði og tækin sem ég nota í starfsemina árið 2013. Ég var þá aðallega í sprautun og réttingu og hélt það yrði tæplega nóg að gera fyrir mig og einn starfsmann í viðbót. En sú varð ekki raunin og síðan þá hefur starfsemin undið töluvert upp á sig, sérstaklega eftir að ferðamennskan tók að aukast hér á Vestfjörðum,“ segir Sindri Gunnar Bjarnarson, eigandi Bílasmiðju SGB.

Fjölbreytt þjónusta við heimamenn og ferðalanga

Fyrirtækið býður upp á réttingar, breytingar á bílum, nýsmíði og fleira. „Við erum þó aðallega í bílasprautun. Einnig erum við aðeins komnir með puttana í dekkjabransann til þess að auka þjónustuna við ferðamenn. Við erum svo með Ford 350-dráttarbíl með spil og kerru og vörubíl, sérútbúinn með krana og palli, á staðnum, aðallega til þess að sækja bilaða eða tjónaða bíla, en við bjóðum líka upp á bílaflutning milli landshluta.“

Hugar að stækkun

Aðspurður segir Sindri almennt mikið að gera í bílabransanum. „Fólk hættir seint að nudda sér utaní, eins og maður segir, og bílarnir hætta ekki að bila. Því er alltaf nóg að gera hjá okkur, þótt auðvitað séu hæðir og lægðir í þessum bransa eins og öðrum. Þrátt fyrir það þá stefni ég á stækkun. Hugmyndin er þá að auka þjónustu og bjóða upp á viðgerðir og fleira. Við erum tveir á verkstæðinu eins og er og ég þarf að ráða fleiri menntaða og góða starfskrafta,“ segir Sindri.

Hafðu samband við Bílasmiðju SGB með því að hringja í síma 847-3413 eða senda netpóst á bilasmidja@gmail.com
Bílasmiðja SGB er staðsett að Seljalandsvegi 86, 400 Ísafirði.