Það má segja að Hveragerði sé innilokað sveitarfélag því Sveitarfélagið Ölfus umlykur bæinn. Meðal annars á Ölfus allt land austan Varmár. Bæjarstjórn Hveragerðis hefur óskað eftir að þessir alltumlykjandi nágrannar láti Hvergerðingum eftir spildu austan við bæinn en spildan nær frá Varmá að fjallsrótum.

Erindi var fyrst sent til nágrannanna í Ölfusi 2015 og aftur í maí 2016. Bæjarráð Ölfuss hafnaði þessari umleitan nágranna sinna. Bæjarráð Hveragerðis segir í bókun vegna málsins að hagsmunir íbúa séu ekki hafði að leiðarljósi hjá Sveitarfélaginu Ölfusi með þessari höfnun. Þá lýsir bæjarráð vonbrigðum sínum með afstöðu bæjarfulltrúa í Ölfusi til beiðninnar.

Fréttablaðið skýrir frá þessu. Segir að í bókun bæjarráðs sé minnt á að það geti ekki verið slæmt að ræða málin með það að markmiði að ná niðurstöðu sem allir geta sætt sig við.

„Það hafa bæjarfulltrúar Hveragerðisbæjar ítrekað gert þegar kemur að því að veita íbúum í dreifbýli Ölfuss þjónustu.“

Segir í bókun bæjarráðs þar sem vísað er til samkomulags sveitarfélaganna um að börnum í dreifbýli Ölfuss bjóðist leikskólavist í Hveragerði til jafns við Hvergerðinga.

„Slíkt samkomulag var gert því hagsmunir íbúa voru hafðir að leiðarljósi.“

Óskar bæjarráð Hveragerðis því eftir að nágrannarnir endurskoði málið.