Það getur verið gott að grípa pizzuafgang úr ísskápnum og hita upp í örbylgjuofninun þegar hungrið sverfur að. En það er einmitt ekki það sem á að gera þegar pizza er hituð, að minnsta kosti ekki ef fólk vill fá stökka og ljúffenga pizzu sem bragðast jafn vel og daginn áður.

Pizzastaðurinn Robertos í Brooklyn í New York bjó eitt sinn til leiðbeiningar um hvernig á að hita pizzur upp. Þó leiðbeiningarnar séu ekki algjörlega nýjar af nálinni þá er um að gera að birta þær, þar sem þær eiga alltaf við.

Það sem til þarf er panna með loki.

1. Pannan er hituð á millihita, þetta þarf að vera panna með „non stick“ húð.
2. Pizzan er sett á pönnuna og hituð í tvær mínútur en þá á botninn að vera orðinn stökkur.
3. Því næst eru nokkrir vatnsdropar settir á heita pönnuna, þeir eiga ekki að snerta pizzuna.
4. Lokið er sett yfir og pizzan látin vera á pönnunni í eina mínútu til viðbótar en þá á osturinn að vera bráðnaður.
5. Þá er bara að borða gómsæta pizzuna.