Barn á leikskólanum í Hnoðraholti í Garðabæ hefur verið greint með mislinga. Þetta staðfesti framkvæmdarstjóri Hjallastefnunnar í samtali við blaðamann. Samband hefur verið haft við sóttvarnalækni og langflesta foreldra.

„Börn sem eru ekki bólusett verða heima næstu tvær vikur og í sem minnstu samneyti við almenning og þá sérstaklega óbólusetta einstaklinga.

Það er gert til að koma í veg fyrir smit í leikskólanum og að það smiti út frá sér.“  

Barnið sem veiktist var aðeins á einum kjarna af nokkrum á leikskólanum en í samráði við sóttvarnalækni var sú ákvörðun tekin að gera ráðstafanir fyrir öll börn leikskólans, sem ekki hafa verið bólusett.

„Svo höldum við foreldrum upplýstum um hverju þau eigi að leita eftir og hvert þau eigi að snúa sér ef það kemur upp grunur um að þau séu smituð.

Vonandi náum við tökum á þessu sem allra fyrst og náum að hefta útbreiðslu.“ 

Börn á Íslandi eru ekki bólusett fyrir mislingum fyrr en við 18 mánaða aldur, Hnoðraholt er dagheimili og leikskóli með börn á aldrinum 9 mánaða til 4 ára sem heyrir undir Hjallastefnuna og dvelja þar um 80 börn.

Landlæknir áréttar mikilvægi bólusetninga á vef sínum:

„Rétt er að minna á að mislingar eru með mest smitandi sjúkdómum sem þekkjast. Engin meðferð er til við sjúkdómnum og eina fyrirbyggjandi meðferðin felst í bólusetningu sem veitir meira en 95% vörn. Þetta minnir á mikilvægi þess að halda hér uppi góðri þátttöku í bólusetningum. Bólusetning gegn mislingum er við 18 mánaða og 12 ára aldur.

Hægt er að bólusetja börn frá 6 mánaða aldri en vörn bólusetningarinnar er óviss á aldrinum 6−12 mánaða. Litlar líkur eru á vernd ef bólusett er fyrir 6 mánaða aldur.“