„Ég verð heima hjá bróður mínum, honum Matthíasi, á gamlárskvöld en hann eldar kótilettur með brúnum kartöflum, rauðkáli og Ora grænum baunum, alveg eins og mamma gerði,“ segir tónlistarmaðurinn Páll Óskar Hjálmtýsson í samtali við DV.

Páll Óskar treður upp á Pallaballi á Spot í Kópavogi í kvöld en hann hefur síðastliðin tólf ár varið þessu síðasta kvöldi ársins á Akureyri. Þar hefur söngvarinn haldið ball á skemmtistaðnum Sjallanum fyrir fullu húsi.

„Fjölskyldan var farin að sakna mín og ég hennar og ég verð með henni og svo tel ég í ballið. Ég er yngstur sjö systkina og þetta verður æðislegt,“ segir Páll Óskar og tekur fram að hann muni spila sína eigin tónlist í bland við önnur partílög og diskó.

Lengi hefur staðið til að rífa Sjallann á Akureyri og hafa ófáar hljómsveitir haldið þar nokkur lokaböll. Palli kvaddi skemmtistaðinn í desember 2014 með stóru balli en þá stóð til að hann yrði rifinn í ársbyrjun 2015. Söngvarinn hélt aftur á móti tónleika þar á gamlárskvöld í fyrra sem var þá alvöru lokaballið. Íslandshótel keyptu Sjallann og húsin í kringum hann síðasta sumar og tilkynntu að húsið yrði rifið eftir um tvö ár.

„Það er ekki búið að loka Sjallanum en hann verður rifinn. Núna er það alveg ljóst og það verða þarna framkvæmdir og væntanlega byggt hótel. Nú verður ekki haldið stórt gigg á Akureyri nema með því að leigja íþróttahús og þá þarf að fá hljóðkerfi og fleira með þeim kostnaði sem því fylgir. Ég mun sakna hússins enda spilað þar í yfir tuttugu ár.“