„Ég var alveg á brúninni. Ég var með velígrundaðar hugmyndir um hvernig ég gæti lokið þessu lífi,“ segir Ólafur F. Magnússon, læknir og fyrrverandi borgarstjóri en hann sökk djúpt ofan í hyldýpi þunglyndis í kjölfar þess að hann hvarf úr borgarstjórn og var á tímabili staðráðinn í að binda endi á líf sitt. Þetta kemur fram í sjónvarpsþættinum Mannamál á Hringbraut. Samkvæmt Ólafi er sama hversu vonlaust lífið er : það er alltaf ljós í myrkrinu.
Auk þess að vera læknismenntaður var Ólafur í borgarstjórn í um tuttugu ár. Þá gengdi hann embætti borgarstjóra í sjö mánuði árið 2008. Hann hefur áður tjáð sig opinberlega um geðhvarfasjúkdóm og alvarlegt þunglyndi en hann gekk í gegnum mikil andleg veikindi eftir að hann steig úr stóli borgarstjóra árið 2008 en reis upp á ný árið 2013.
Í viðtali við Útvarp Sögu fyrr á árinu kvaðst hann hafa verið dauðans dyr vegna eineltis af hálfu annarra borgarfulltrúa. „Ég sagði á hverjum einasta degi að ég vildi ekki lifa lengur. Mér leið svo illa,“ sagði hann en bætti við að hann væri lífsglaður og sterkur einstaklingur í dag.
„Ég fordæmi sjálfa mig fyrir að hafa haft þessar hugmyndir af því að sonur minn, elsku Egill minn yngsti sonur minn, hann sagði: pabbi, þú mátt ekki taka líf þitt, ekki gera mér það,“ segir Ólafur í samtali við Mannamál.
Mín skilaboð til fólks eru: Sama hvað ykkur líður illa, og allt er búið og ykkur langar ekki að lifa lengur, þið megið ekki setja þann kross á ættingja ykkar að taka líf ykkar. Það er alltaf útgönguleið: ég er dæmi um það. Ég var búinn að vera meira og minna rúmliggjandi í eitt og hálft ár en svo kom ég til baka.“
Hann segir alla hafa tilgang í lífinu. „Ég er mjög meðvitaður um það allt frá barnæsku að ég hef tilgang í lífinu um að skapa eitthvað sem skiptir máli og liggur eftir mig þegar ég er farinn,“ segir hann og nefnir að eftir hann liggi meðal annars störf hans í pólitík og tugþúsundir góðra læknisverka.
„En sérstaklega er ég þó glaður yfir því að ég hef uppgvötvað tónskáld, ljóðskáld og söngvara í Ólafi F. Magnýssyni því það hafði enginn hugmynd um það.“
[youtube https://www.youtube.com/watch?v=YYAIn549GbA&w=600&h=315]
