Krónan hefur, eins og Melabúðin, ákveðið að hætta að selja Brúnegg. Þetta tilkynnti verslunin eftir Kastljósþátt gærkvöldsins. Krónan rekur 17 verslanir víða um land. Í þættinum kom fram að neytendur hafa um árabil verið blekktir með merkingum þess efnis að eggjaframleiðsla fyrirtækisins væri vistvæn og varphænurnar frjálsar.

Í mörg ár hefur Matvælastofnun reynt að fá eigendur Brúneggja til að bæta úr aðbúnaði dýranna en í Kastljósi í gær var sýnt myndefni sem sýnir fram á afar slæmar aðstæður í húsum. Fyrir ári síðan mátti engu muna að fyrirtækinu yrði lokað vegna þess að ástandið þótti algjörlega óviðunandi. Brúnegg neyddust þá til að slátra 14 þúsund hænum.

Krónan lítur svo á að verslunin hafi verið að selja viðskiptavinum vöru undir fölsku flaggi. Neytendur sem spurst hafa fyrir hafa fengið þau svör að þeim standi til boða endurgreiðsla á vörum sem þeir eiga í fórum sínum.