Í gegnum árin hafa margir horft á jólamyndina Home Alone sem segir sögu Kevin McCallister sem berst við tvo illskeytta innbrotsþjófa sem brjótast inn á heimili hans um jólin. Foreldrar Kevin og systkin eru að heiman en hann gleymdist einfaldlega heima og er því einn í risastóru húsi fjölskyldunnar. En þrátt fyrir að myndin sé komin ágætlega til ára sinna þá virðast hörðustu aðdáendur hennar bara nýverið hafa tekið eftir svolitlu sérstöku á heimilinu.

Margir halda því fram að þetta sé ein besta jólamynd sögunnar en aðrir eru því algjörlega ósammála en hvað sem því líður er myndin mjög vinsæl og margir sem horfa alltaf á hana í aðdraganda jólanna.

Nýverið spannst nokkur umræða á samfélagsmiðlum um þá staðreynd að heimili Kevin er nánast eingögnu í klassískum jólalitum, rauðum og grænum. Svo virðist sem fjölskyldan hafi ákveðið að vera með ákveðið jólaþema í húsinu og þá ekki bara í skreytingum heldur einnig í föstum innréttingum.

Nú ef fólk efast um þetta þá er auðvitað ekki annað að gera en skella myndinni á skjáinn og rannsaka málið.