„Það er rosalega skrítið að vera búin að lifa í líkama sínum í geðveikt langan tíma og þekkja líkama sinn og maður sér sig í spegli. Svo allt í einu sér maður einhvern hluta af líkama sínum sem maður bara vissi ekki hvernig leit út,“ segir Salka Sól Eyfeld tónlistarkona í meðfylgjandi myndskeiði þar sem umfjöllunarefnið er píkuskoðun.
Það er Völvan sem kemur að gerð myndbandisins en fyrsta myndband Völvunnar var frumsýnt í mars á seinasta ári og var þá meðal annars rætt við Öldu Villijós og Margréti Erlu Maack um blæðingar, sjálfsfróun og kynfræðslu. Að þessu sinni er umræðuefnið viðhorf og kynni kvenna af kynfærum sínum.
Auk Sölku er einnig rætt við Guðrúnu Esther Árnadóttur, Maríu Guðmundsdóttur, Ingu Björk Bjarnadóttur, Indíönu Rós Ægisdóttur og Bylgju Babýlons og lýsa þær allar upplifun sinni af því að skoða á sér píkuna.
„Ég fékk einhvern tímann einhverja bók þegar ég var unglingur þar sem var mynd af konu sem sat með spegil. Þar var verið að hvetja stelpur til að skoða á sér píkuna. Mér hafði ekki dottið þetta í hug. Það fyrsta sem ég gerði var að ná í spegil og skoða á mér píkuna. Ég gat horft í svona hálfa sekúndu,“ segir Salka Sól og lýsir þvínæst viðbrögðum sínum við því sjá þennan forboðna líkamshluta í fyrsta sinn. Henni hreinlega brá.
„Ég held að það sé brjálæðislega mikilvægt að skoða á sér píkuna, reglulega. Af því að hún breytist, hún hlýtur að breytast. Skoða hana í allskonar ástandi, rakaða eða órakaða.“
Völvan er verkefni þriggja ungra kvenna á aldrinum 19 til 24 ára. Þær eru Inga Björk Bjarnadóttir, Ingigerður Bjarndís Ágústsdóttir og Anna Lotta Michaelsdóttir en þær fengu styrk að upphæð 300 þúsund króna frá Reykjavíkurborg í janúar á seinasta fyrir verkefninu. Fannst þeim vanta opinskáa umræðu um píkuna og telja að fræðsla í skólum sé takmörkuð. Verkefnið snýr líka að líkamsvirðingu, kynferðisofbeldi, getnaðarvörnum, kynlífi, sjálfsfróun og barneignum.Tilgangur verkefnisins er að vera vitundarvakning um málefni píkunnar.
[youtube https://www.youtube.com/watch?v=ufaicO0s0Ao&w=752&h=423]
