Þingréttur í Syðri-Þrændalögum í Noregi sakfelldi konuna nýlega fyrir umfangsmikla svikastarfsemi þar sem hún hafði látið sem hún væri með krabbamein og hafði sagt læknum það sem og almannatryggingum, tryggingafélagi og vinum og ættingjum. Svikastarfsemin stóð yfir á árunum 2014 og 2015.
Á þessum tíma tókst konunni að svíkja 466.000 norskar krónur út úr almannatryggingum með því að veita rangar upplýsingar um heilsufar sitt. Hún var einnig sakfelld fyrir skjalafals og að hafa sagt lækni sínum að ýmsar rannsóknir hafi verið gerðar á henni sem voru aldrei gerðar.
Fyrir dómi sagði konan að læknir hefði blekkt hana. Hún sagðist hafa farið til læknis í ágúst 2014 og hefði læknirinn sagt henni að hún væri með krabbamein í heila og hefði hún verið sett í geislameðferð samdægurs. Í dómsorði kemur fram að frásögn konunnar sé ekki mjög marktæk, hún sé óraunveruleg og að konan hafi orðið margsaga. Það og sú staðreynd að konan er menntaður hjúkrunarfræðingur varð til þess að rétturinn taldi ekki trúlegt að hægt hefði verið að plata konuna svona auðveldlega.
Á þeim tíma sem svikastarfsemin stóð yfir fékk konan ávísað miklu magni lyfja sem virka í raun sem fíkniefni ef þau eru notuð til annars en gegn ákveðnum sjúkdómum. Konan sveik einnig 200.000 norskar krónur út úr tryggingafélagi sínu með því að staðhæfa að hún væri með krabbamein.
Samkvæmt frétt TV2 er konan ekki hætt að segja að hún sé með krabbamein og haldi hún því statt og stöðugt fram á samfélagsmiðlum. Hún hefur áfrýjað dómnum.
